ओली भेट्न बालकोट पुगे प्रधानमन्त्री प्रचण्ड

काठमाडौं– प्रधानमन्त्री पुष्पकमल दाहाल प्रचण्ड एमाले अध्यक्ष केपी ओलीलाई भेट्न बालकोट निवास पुगेका छन्। शुक्रबार दिउँसो बालकोट पुगेका प्रधानमन्त्री प्रचण्ड र अध्यक्ष ओलीबीच सरकारको भविष्य र राष्ट्रपतिको निर्वाचनलगायत विषयमा कुराकानी भइरहेको छ।

सत्ता गठबन्धनमा आबद्ध दुई नेताबीच राष्ट्रपति निर्वाचनबारे छलफल भइरहेको बताइन्छ। शुक्रबार मात्रै कांग्रेसले राष्ट्रपतिमा सघाए पूरै कार्यकाल प्रधानमन्त्रीको ग्यारेन्टी दिएपछि ओलीले प्रचण्डसँग यसबारे कुराकानी गर्दै रहेको बुझिएको छ।  

यसअघि बिहीबार प्रचण्ड र ओलीबीच प्रधानमन्त्री निवास बालुवाटारमा दुई घन्टा एक्लाएक्लै वार्ता भएको थियो। उक्त वार्ता पनि राष्ट्रपति निर्वाचनमै केन्द्रित थियो।