जनयुद्ध दिवसमा सार्वजनिक बिदा दिने सरकारको निर्णय

सरकारले जनयुद्ध दिवसमा सार्वजनिक बिदा दिने निर्णय गरेको छ। आइतबार दिउँसो प्रधानमन्त्री तथा मन्त्रिपरिषद् कार्यालय सिंहदरबारमा बसेको मन्त्रिपरिषद् बैठकले फागुन १ गते जनयुद्ध दिवसका रूपमा सार्वजनिक बिदा दिने निर्णय गरेको हो।

बागमती र कर्णाली प्रदेश सरकारले पनि जनयुद्ध दिवसमा बिदा दिने निर्णय गरिसकेको छ। बागमतीमा माओवादी नेता शालिकराम जम्मकट्टेल र कर्णालीमा पनि माओवादीकै रामकुमार शर्मा मुख्यमन्त्री छन् भने प्रधानमन्त्री माओवादी अध्यक्ष प्रचण्ड।

२०५२ फागुन १ गतेबाट सुरू भएको जनयुद्ध २०६३ मंसिर ५ गते विस्तृत शान्ति सम्झौतामा रूपान्तरण भएको थियो। त्यही जनयुद्धको जगमा नेपालमा राजनीतिक परिवर्तन सम्भव भएको दाबी माओवादीले गर्दै आएको छ। गणतन्त्र, संघीय प्रणाली, समावेशी लोकतन्त्र, सामाजिक न्यायजस्ता उपलब्धि जनयुद्ध र जनआन्दोलनको बलमा नै स्थापित भएको हो।

जनयुद्धको नेतृत्वकर्ता पार्टी माओवादीले प्रत्येक वर्ष फागुन १ गतेलाई जनयुद्ध दिवसको रूपमा मनाउँदै आएको छ। 

यसअघि पुस २७ लाई राष्ट्रिय एकता दिवसका रूपमा सरकारले सार्वजनिक बिदा दिएको थियो।