ओलीको प्रस्ताव- समृद्धिका लागि राजनीतिक स्थायित्वको नयाँ युगमा प्रवेश गरौं

काठमाडौं- नेकपा एमालेका अध्यक्ष एवम् प्रतिनिधिसभा सदस्य केपी शर्मा ओलीले सत्तारुढ गठबन्धन परिपक्व सहकार्यका साथ अगाडि बढिरहेको रहेको बताएका छन्।

प्रतिनिधि सभाको आजको बैठकलाई सम्बोधन गर्दै ओलीले अस्थिरताको राजनीतिक प्रहार निरन्तर बेहोर्नु परिरहेको बताए। उनले राजनीतिक स्थायीत्व अपेक्षा गरि जारी गरिएको संविधान घोषणा भएको सात वर्षमा सात प्रधानमन्त्री फेरिनु दुखद भएको बताए।

अविश्वास, डर र विभिन्न खालका अनूचित साटगाठले यो अवस्था सिर्जना भएको ओलीको धारणा छ। 'अब आत्मविश्वास र निडरताका साथ नेपाल र नेपालीको समृद्धिका लागि मुलुकलाई राजनीतिक स्थायीत्वको नयाँ युगमा प्रवेश गरौं। म सबै राजनीतिक दलमा आवद्ध साथिहरूलाई आग्रह गर्न चाहन्छु,' उनले भने।

लोकतन्त्र, स्वतन्त्रता र विकासलगायतका सवालमा सबै दल एकै ठाउँमा उभिनु पर्ने उनको भनाइ छ।