आज बस्ने रास्वपाको बैठकले सरकारमा रहने वा बाहिरिने निर्णय गर्ला?

काठमाडौं- गृह मन्त्रालय नपाए सरकारबाट बाहिरिने चेतावनी दिइरहेको राष्ट्रिय स्वतन्त्र पार्टी (रास्वपा) को केन्द्रीय समिति र संसदीय दलका सदस्यहरूको बैठक आज पनि बस्ने भएको छ।

शनिबार राति बसेको बैठक निष्कर्षविहीन भएपछि रास्वपाले आज पनि बैठकलाई निरन्तरता दिने भएको हो। बैठक बिहान ११ बजे बस्नेछ। बैठकले गृह मन्त्रालय नपाए सरकारमा रहने कि नरहने भन्ने विषयमा निर्णय गर्ने बताइएको छ।

गत बिहीबार पार्टी बैठकका निर्णय सार्वजनिक गर्दै रास्वपा प्रवक्ता डा. मुकुल ढकालले प्रधानमन्त्री पुष्पकमल दाहाल प्रचण्ड र एमाले अध्यक्ष केपी शर्मा ओलीले फोन गरेरदुई दिनको समय मागेको बताएका थिए।  त्यो दुई दिनको अल्टिमेटम शनिबार मध्यरातिबाट सकिएको छ।