बागमती सरकारका नवनियुक्त मन्त्रीको सपथ

काठमाडौं– बागमती प्रदेशको सत्ता गठबन्धनमा आबद्ध एमाले, माओवादी र राप्रपाका नवनियुक्त मन्त्रीले सपथ लिएका छन्। नवनियुक्त मन्त्रीलाई बागमती प्रदेश प्रमुख यादवचन्द्र शर्माले पद तथा गोपनीयताको सपथ खुवाएका हुन्। 

आज सपथ लिने मन्त्रीमा एमालेका ४, माओवादीका ४ र राप्रपाबाट ३ जना रहेका छन्। योसँगै बागमती प्रदेश सरकारले पूर्णता पाएको छ। एमालेबाट एकालाल श्रेष्ठ श्रम, रोजगार तथा यातायातमन्त्री, रामेश्वर श्रेष्ठ स्वास्थ्यमन्त्री, केशव पोख्रेल कृषि तथा पशुपक्षी विकासमन्त्रीमा नियुक्त भएका छन्।

माओवादी केन्द्रबाट कुमारी मोक्तान सामजिक विकासमन्त्री, गंगानारायण श्रेष्ठ आन्तरिक मामिला तथा कानुनमन्त्री र युवराज दुलाल भौतिक योजना तथा पूर्वाधार मन्त्री बनेका छन्। राप्रपाका राजु विष्ट वन तथा वातावरणमन्त्री, डम्बर तामाङले पर्यटन, उद्योग तथा सहकारीमन्त्रीमा नियुक्त भई पद तथा गोपनीयताको सपथ लिएका हुन्।