देउवाले बोलाए कांग्रेस पदाधिकारी बैठक

काठमाडौं– कांग्रेस सभापति शेरबहादुर देउवाले पदाधिकारी बैठक बोलाएका छन्। सभापति देउवाले बिहीबार मध्याह्न बस्ने गरी आफ्नै निवास धुम्बाराहीमा पदाधिकारी बैठक बोलाएको कांग्रेस मुख्यसचिव कृष्णप्रसाद पौडेलले बताएका हुन्। 

पदाधिकारी बैठकमा देउवाले पार्टीका शीर्ष नेतालाई समेत आमन्त्रण गरेका छन्। कांग्रेसको केन्द्रीय समिति बैठक १५ माघमा सारिएको छ। पहिले २२ पुस र २८ पुसमा बस्ने भनिएको बैठक माघमा सारिएको हो।

कांग्रेसले प्रधानमन्त्री पुष्पकमल दाहाल प्रचण्डलाई विश्वासको मत दिएर प्रतिपक्षमा बस्ने निर्णय गरेपछि चौतर्फी आलोचना भएको छ। आलोचनाकै बीचमा देउवाले पदाधिकारी बैठक बोलाएका हुन्। आगामी ५ माघमा प्रतिनिधिसभा सभामुखको निर्वाचनमा कसलाई उम्मेदवार बनाउने भन्ने विषयमा छलफल गर्न देउवाले पदाधिकारी बैठक बोलाएको बताइन्छ।