कांग्रेसले बोलायो कार्यसम्पादन समिति बैठक

काठमाडौं– प्रतिपक्षी नेपाली कांग्रेसको पदाधिकारी बैठक प्रधानमन्त्री पुष्पकमल दाहाल प्रचण्डको सरकारलाई विश्वासको मत दिने÷नदिने भन्नेबारे टुंगोमा पुग्न सकेन। 

मंगलबार बिहान पार्टी सभापति शेरबहादुर देउवाको धुम्बाराही निवासमा बसेको पार्टी पदाधिकारी बैठकले थप छलफलका लागि केन्द्रीय कार्यसम्पादन समिति बैठक आह्वान गर्ने निर्णय गरेको महामन्त्री विश्वप्रकाश शर्माले बताएका हुन्।

कार्यसम्पादन समितिको बैठक बिहान साढे ११ मा बस्ने गरी बैठक बोलाइएको हो। प्रधानमन्त्री प्रचण्डलाई विश्वासको मत दिने÷ नदिने निर्णय गर्न कांग्रेसले एकपछि अर्को बैठक बोलाएको हो।

कांग्रेसभित्र प्रधानमन्त्री दाहाललाई विश्वासको मत दिने/नदिने भन्नेमा नेताहरू विभाजित छन्। केन्द्रीय कार्यसम्पादन समिति बैठकपछि मंगलबार नै संसदीय दल बैठक पनि बस्दै छ। बिहान ९ बजे बस्ने भनिएको संसदीय दलको बैठक चार घन्टा ढिलो गरी पर सारिएको दिउँसो १ बजेका लागि सारिएको छ।