कांग्रेस संसदीय दलको बैठक चार घन्टा पछि सारियो

काठमाडौं– प्रतिपक्षी नेपाली कांग्रेसको ९ बजे बस्ने भनिएको संसदीय दलको बैठक चार घन्टा ढिलो गरी पर सारिएको छ। मंगलबार बिहान ९ बजे बस्ने भनिएको बैठक दिउँसो १ बजेका लागि सारिएको कांग्रेस नेता एवं सांसद रामहरि खतिवडाले बताएका हुन्।

धुम्बाराहीमा जारी पदाधिकारी बैठक लम्बिएका कारण कांग्रेसले संसदीय दलको बैठकको समय सारेको हो। कांग्रेसमा वर्तमान प्रचण्ड नेतृत्वको सरकारलाई विश्वासको मत दिने/नदिने भन्ने विषयमा दुईमत छ।

सोमबार प्रधानमन्त्री प्रचण्ड धुम्बाराही पुगेर कांग्रेस सभापति शेरबहादुर देउवासँग विश्वासको मत मागेका थिए। देउवाले मंगलबार पदाधिकारी र संसदीय दलको बैठकबाट यस विषयमा निर्णय गरिने जानकारी प्रधानमन्त्री प्रचण्डलाई दिएका थिए।