विश्वासको मतबारे निर्णय गर्न कांग्रेस संसदीय दलको बैठक बस्दै

काठमाडौं- नेपाली कांग्रेस संसदीय दलको बैठक आज बस्ने भएको छ। प्रधानमन्त्री पुष्पकमल दाहाललाई विश्वासको मत दिने वा नदिने भन्ने विषयमा निर्णय गर्न बैठक बस्न लागेको हो।

संसदीय दलको बैठक बस्नुअघि पदाधिकारी बैठक बस्नेछ। प्रधानमन्त्री प्रचण्डले मंलबार विश्वासको मत माग्दैछन्। दाहाल एमालेसहित सात दलको समर्थनमा पुस १० गते प्रधानमन्त्री पदमा नियुक्त भएका हुन्।

प्रधानमन्त्री नियुक्त भएको ३० दिनभित्र प्रतिनिधिसभाबाट विश्वासको मत लिनुपर्ने प्रावधान रहेको छ। विश्वासको मत लिनका लागि प्रधानमन्त्री प्रचण्डले १३८ जना सांसदको समर्थन लिनुपर्ने हुन्छ।

हिजो बसेको पहिलो संसद् बैठकमा प्रचण्डले सबै दलहरूसँग विश्वासको मत दिन अनुरोध गरेका थिए। साथै बेलुका नै उनले प्रमुख प्रतिपक्षी दलका नेपाली कांग्रेसका सभापति शेरबहादुर देउवासँग भेटी विश्वासको मत दिन अनुरोध गरेका थिए।