संघीय प्रणालीले देशमा मन्त्री र सांसदको कारखाना खुलायो : अध्यक्ष केसी

काठमाडौं– राष्ट्रिय जनमोर्चाका अध्यक्ष चित्रबहादुर केसीले संघीय शासन प्रणालीले देशको अर्थतन्त्र ओरालो लागेको बताएका छन्। सोमबार प्रतिनिधिसभाको बैठकलाई सम्बोधन गर्दै उनले भएका कारखाना बन्द गरेर मन्त्री र सांसदको संख्या बढेपछि देशको अर्थतन्त्र बिग्रिएको बताएका हुन्। 

‘संघीय लोकतान्त्रिक व्यवस्थापछि देश स्वीट्जरल्यान्ड हुन्छ भनेर संविधान बनाउँदाका बखत पानी खाँदै वकालत गरेको सुनेको थिएँ। भयो त्यस्तो?’ उनले भने, ‘देशमा उद्योग कलकारखाना खोल्नु नपर्ने, भएका उद्योग कलकारखाना निजीकरण गर्ने, कारखाना संघीय प्रणालीअनुसार खोलिएको भनेको मन्त्री र सांसदको मात्र हो।’ 

देशमा मन्त्री र सांसद धेरै हुँदा अर्थतन्त्रले नधान्ने भन्दै उनले अब संघीयता नटिक्ने दाबी गरे। घुस खानु र भ्रष्टाचार गर्नु नैतिक अधिकारजस्तो भएको भन्दै अध्यक्ष केसीले गणतन्त्र र संसदीय व्यवस्थाप्रति जनताको निराशा बढेको दाबी गरे। गणतन्त्रप्रति जोखिम गणतन्त्रका लागि लडेका नेताहरूबाटै हुने उनको धारणा छ।