काठमाडौं– नेकपा माओवादी केन्द्रका अध्यक्ष पुष्पकमल दाहाल प्रचण्डलाई प्रधानमन्त्रीमा समर्थन गरेको नेपाल राष्ट्रिय स्वतन्त्र पार्टी यतिबेला चर्चामा छ।
सात दलीय गठबन्धनबाट उपप्रधान तथा गृहमन्त्रीको जिम्मा पाएका उक्त पार्टीका अध्यक्ष रवि लामिछानेले प्रधानमन्त्री प्रचण्ड र गठबन्धनका संयोजक एमाले अध्यक्ष केपी ओलीलाई तारन्तर भेटिरहेका छन्।
शनिबार बिहान मात्रै प्रधानमन्त्री प्रचण्डलाई प्रधानमन्त्री निवास बालुटावारमा भेटेका लामिछानेले त्यसलगत्तै बालकोट पुगेर ओलीसँग गठबन्धनलाई कसिलो बनाउने र जनतालाई सहज सेवा दिने प्रक्रियाबारे छलफल गरेका हुन्।
बालकोट बार्दलीमा ओली र लामिछानेबीच सबै विषयमा छलफल भएको गृहमन्त्रीको सचिवालयले जनाएको छ। गठबन्धनको भागबन्डादेखि सरकारको काम गराइको तरिका र गृह प्रशासन सञ्चालनका सन्दर्भमा समेत छलफल भएको थियो।
एमाले अध्यक्ष ओलीले लामिछानेलाई गृहमन्त्रीका रूपमा आफूले गरेको कामको अनुभव साटासाट गरेका थिए। ओली स्व. मनमोहन अधिकारीको प्रधानमन्त्री काल २०५१ मा गृहमन्त्री भएका थिए।
सरकारको नीति तथा कार्यक्रम र यसको प्रभावकारिताबारे एमालेका अध्यक्षसँग छलफल भएको गृहमन्त्रीको सचिवालयले जनाएको छ।
प्रकाशित: Dec 31, 2022| 13:28 शनिबार, पुस १६, २०७९
