कांग्रेस महामन्त्रीद्वय थापा र शर्माको घोषणा– अबको सरकारमा मन्त्री हुँदैनौं

काठमाडौं– कांग्रेस महामन्त्रीद्वय गगन थापा र विश्वप्रकाश शर्माले नयाँ सरकारमा मन्त्री नबन्ने र पार्टी संगठनलाई मात्र ध्यान दिइने बताएका छन्।बुधबार भएको कांग्रेस संसदीय दलको निर्वाचनमा पार्टी सभापति शेरबहादुर देउवाका प्रतिस्पर्धी रहेका थापालाई शर्माले समर्थन दिएका थिए। तर थापा देउवासँग ठूलो मतान्तरले पराजित भए।

महामन्त्री शर्माले भने, ‘अब हामी पार्टी कार्यालयमा बसेर काम गर्छौं। पार्टीलाई सुसंगठित गर्ने धेरै काम हामी दुवै जनाको जिम्मामा छ। अब मन्त्रीका लागि पहल हुँदैन।’ सरकारमा जाने नेतालाई घोषणापत्रमा उल्लेख गरिएका प्रतिबद्धताअनुसार काम गर्न दबाब दिइने उनले बताए। 

संसदीय दलको नेतामा सभापति देउवासँग पराजित महामन्त्री थापाले पनि अब सरकारमा मन्त्री हुने चाहनो नरहेको बरु संसदीय दलको नेताका लागि निरन्तर प्रयास गरिरहने बताए।