प्रधानमन्त्री देउवा र महन्थ ठाकुरबीच सरकार गठनबारे छलफल

काठमाडौं– प्रधानमन्त्री शेरबहादुर देउवा र लोकतान्त्रिक समाजवादी पार्टी (लोसपा)का अध्यक्ष महन्थ ठाकुरबीच भेटवार्ता भएको छ। प्रदेश तथा प्रतिनिधिसभा निर्वाचनको नतिजा अन्तिम चरणमा पुग्दै गर्दा गठबन्धनका दुई शीर्ष नेताबीच भेटवार्ता भएको हो। 

दुई नेताबीच बुधबार साँझ प्रधानमन्त्रीको सरकारी निवास बालुवाटारमा छलफल भएको हो। भेटमा निर्वाचन परिणामको समीक्षासहित नयाँ सरकार गठनका विषयमा छलफल भएको बताइएको छ। 

लोसपा चुनावको केही दिनअघि मात्रै सत्ता गठबन्धनमा आवद्ध भएको हो। प्रतिनिधिसभा सदस्यका लागि लोसपाले मधेस प्रदेशका ७ सिटमा गठबन्धन दलसँग तालमेल गरेको थियो, जसमध्ये ३ सिटमा लोसपाले जित हासिल गरेको छ।