निर्वाचनमा सोचेजस्तो परिणाम नआए पनि कांग्रेसकै नेतृत्वमा सरकार : शेखर कोइराला

काठमाडौं– कांग्रेस नेता डा. शेखर कोइरालाले निर्वाचनमा सन्तोषजनक परिणाम नआए पनि कांग्रेसकै नेतृत्वमा सरकार बन्ने बताएका छन्। बिहीबार विराटनगरमा आयोजित पत्रकार सम्मेलनमा नेता कोइरालाले यस्तो बताएका हुन्। 

संसदीय दलमा सभापति शेरबहादुर देउवाको वर्चस्व भए पनि पार्टीभित्र नेता छनोटको निर्वाचनमा प्रयास गरिने उनको धारणा छ। उनले भने, ‘संख्यामा हेर्दा शेरबहादुरजीकै वर्चस्व देखिन्छ। अब हामी कसरी अगाडि बढ्ने भन्नेमा पार्टी सभापति शेरबहादुरजीसँग कुरा गर्छु। अन्य साथीहरुसँग पनि कुरा गर्छाैं।’

कोइरालाको समूहबाट प्रत्यक्ष निर्वाचन जितेका महामन्त्री गगन थापाले संसदीय दलको नेताका लागि उम्मेदवारी घोषणा गरिसकेका छन्। तर कोइरालाले यसबारे कुनै प्रतिक्रिया दिएनन्।

उनले भने, ‘संसदीय व्यवस्थामा नेतृत्व लिनेले सदस्य संख्यामा भर पर्नुपर्छ। हामीले कोसिस गर्ने हो। संसदीय नेताको चुनावमा पराजित भए पनि शिथिल भएर बस्ने होइन। हाम्रा एजेन्डा छँदै छन्, तिनलाई अगाडि बढाउने हो।’ संसदीय दलको नेतामा दाबी गरिरहेका नेता थापासँग फोनमा मात्रै कुरा भएको उनले बताए।