निर्वाचनमा पराजय बेहोर्नुको समीक्षा प्रतिवेदन पार्टी मुख्यालय पठाउन जसपाको निर्देशन

काठमाडौं– जनता समाजवादी पार्टी (जसपा)ले ४ मंसिरमा सम्पन्न प्रतिनिधिसभा तथा प्रदेशसभा निर्वाचनमा पराजित हुनुपर्ने कारणसहित १५ दिनभित्र प्रतिवेदन पार्टी मुख्यालय पठाउन मातहतका निकायलाई निर्देशन दिएको छ। 

जसपाले सबै प्रदेश समिति, राष्ट्रिय समिति र जिल्ला समन्वय समितिलाई १५ दिनभित्र चुनावी समीक्षा प्रतिवेदन केन्द्रमा पठाउन निर्देशन दिएको हो। जसपाले एमालेसँग तालमेल गरेर चुनाव लडेकामा प्रत्यक्षतर्फ ७ सिट जितेको छ। पार्टी अध्यक्ष उपेन्द्र यादव निर्वाचनमा पराजित भए।

अध्यक्ष यादवले प्रदेश समिति, राष्ट्रिय समिति र जिल्ला समन्वय समितिलाई पत्र लेखेर जिल्ला र निर्वाचन क्षेत्रस्तरीय समीक्षा बैठक राख्न निर्देशन दिएका छन्। निर्वाचन क्षेत्रका उम्मेदवारलाई सहभागी गराई चुनावी समीक्षा गरेर त्यसको प्रतिवेदन १५ दिनभित्र केन्द्रमा पठाउन यादवले निर्देशन दिएका हुन्। समीक्षा सत्यतथ्यमा आधारित र पूर्वाग्रहरहित हुनुपर्ने अध्यक्ष यादवको भनाइ छ।