७० प्रतिशत मतदान हुने अनुमान, गणना आजै बेलुकाबाट सुरु हुने

काठमाडौं- प्रमुख निर्वाचन आयुक्त दिनेशकुमार थपलियाले प्रदेश तथा प्रतिनिधिसभा चुनावमा मतदान गर्नका लागि एक जनालाई करिब २ मिनेट लाग्ने बताएका छन्।

भक्तपुरको लोकन्थलीस्थित युनिक नेपाल एकेडेमी मतदान केन्द्रबाट मतदान गरिसकेपछि सञ्चारकर्मीसँग कुरा गर्दै प्रमुख आयुक्त थपलियाले मतदान छिटो र सहज बनाउन देशैभरका निर्वाचन अधिकृतहरूलाई आग्रह गरे।

त्यस्तै थपलियाले मतदान केन्द्रहरू अपांगमैत्री बनाइएको जानकारी दिए। प्रमुख आयुक्त थपलियाले यस पटक ७० प्रतिशतभन्दा बढी मत खस्ने सम्भावना रहेको बताए। २ दिन बिदा भएकाले पनि मतदानमा मतदाता उत्साहित भएको उनको भनाइ छ।

बेलुका मतदान सकिनेबित्तिकै सबै मतदानकेन्द्रहरूबाट मतपेटिका संकलन गरिने उनले बताए। आज बेलुका ८ बजेतिरबाट मतगणना सुरु हुने बताए।