पञ्चायतकालीन सारथिको भिडन्तबाट डीनाले उठाउलिइन् फाइदा?

काठमाडौं- गत स्थानीय निर्वाचनमा हेटौँडा उपमहानगरपालिकाको त्रिपक्षीय भिडन्त रोचक देखियो। राष्ट्रिय प्रजातन्त्र पार्टीका दीपकबहादुर सिंह, नेकपा एकीकृत समाजवादीकी मीना लामा र नेकपा एमालेका अनन्त पौडेलबीच मेयरका लागि भएको प्रतिस्पर्धाको मतगणनामा एकपछि अर्कोले अग्रता लिने गरेकाले नेपाली राजनीतिको ध्यान हेटौँडाले आकर्षित गरेको थियो। 

मतगणना प्रतिस्पर्धात्मक भएपनि अन्तिम नतिजा सार्वजनिक हुँदा समाजवादीकी लामाले २३ हजार ७५ मत ल्याएर प्रमुखमा विजयी भइन्। कडा काउन्टर दिएका पौडेलले २० हजार ९०८ र सिंहले २० हजार ५३१ मत ल्याए। 

उक्त क्षेत्रमा आगामी मंसिर ४ मा हुने प्रतिनिधिसभा निर्वाचनमा पुनः कडा भिडन्त हुने निश्चित देखिएको छ। मकवानपुर-१ मा राप्रपाको टिकट लिएर सिंह पुनः मैदानमा छन्, एमालेको सूर्य चिह्न बोकेर उनका प्रतिस्पर्धी बनेका छन्, पञ्चायनकालीन सारथी कमल थापा। यता, सत्ता गठबन्धनले महालक्ष्मी उपाध्याय 'डीना'लाई आफ्नो साझा उम्मेदवारका रूपमा अघि सारेको छ।

पञ्चायतकालदेखि हालसम्म सधैँ सबै व्यवस्थाको लाभ लिएका थापा सधैँ चुनाव लडिरहने तर हारिरहने राजनीतिक पात्र हुन्। २०५१ को मध्यावधि चुनावमा बाहेक कहिल्यै उनले जितको फूलमाला लगाउन पाएका छैनन्। यता, सिंह र डीनाको विगत पनि उस्तै छ, सधैँ उम्मेदवार बनेका यी दुईले हालसम्म एकपटक पनि जित निकाल्न सकेका छैनन्। सधैँ चुनाव लडिरहेका तर हारिरहेका यी तीन नेताबीचको भिडन्तका कारण रोचक छ।

त्यसबेला थापाको विश्वासपात्रका रुपमा उनी पछाडि थिए अहिले उनीसँगै प्रतिस्पर्धा गर्न लागेका दीपकबहादुर सिंह। थापा र सिंहको दोस्तियारी राप्रपा गठन हुनुभन्दा पनि एक दशक पुरानो हो। २०४७ मा सूर्यबहादुर थापा र लोकेन्द्रबहादुर चन्दद्वारा गठित राप्रपाबाट संयुक्त सहकार्य गरेका थापा र सिंह ३२ वर्षसम्म एकै दलमा रहेर बलियोसँग एकअर्कासँग सहकार्य गरे। 

२०५३ मा राप्रपा-एमालेबीच गठबन्धन भई लोकेन्द्रबहादुर चन्दको नेतृत्वमा बनेको सरकार ढाल्न कांग्रेसले सूर्यबहादुर थापालाई प्रधानमन्त्री बनाउने गरी राप्रपा–कांग्रेसबीच गठबन्धनको प्रस्ताव गर्‍यो। उक्त प्रस्तावको पक्षमा बलियोसँग उभिएका थापा त्यसयता सधैँ नेपाली राजनीतिमा शक्तिको नजिक छन्। आफूलाई छाडेर थापाले सूर्यबहादुरलाई साथ दिएपछि त्यसबेला चन्दले उनलाई इंगित गर्दै भनेका थिए, ‘जहाज डुब्न लागेको थाहा पाएपछि सबैभन्दा पहिले मुसाहरु जहाज छाडेर जान्छन्।’ चन्दले थापालाई लगाएको उक्त ‘मुसाप्रवृत्ति’को ट्याग आज पनि उस्तै छ।