मेयर बालेनको धारणा अराजक रहेको ठहर, गम्भीर ध्यानाकर्षण गराउने मन्त्रिपरिषद्‍को निर्णय

काठमाडौं- काठमाडौं महानगरपालिकाका मेयर बालेन्द्र शाहले पछिल्ला दुई दिनमा व्यक्त गरेको धारणा अराजक रहेको ठहर सरकारले गरेको छ।

मन्त्रिपरिषद्को आजको बैठकले यस्तो ठहर गरेको हो। मेयर शाहले पछिल्ला दिनमा संघीय सरकारका विषयमा सामाजिक सञ्जालमा राखेको धारणा अराजक रहेको ठहर गरिएको सरकारका प्रवक्ता तथा सञ्चार तथा सूचना प्रविधि मन्त्री रेखा शर्माले जानकारी दिइन्।

बैठकपछि उनले भनिन्, 'सिंहदरबार र बालुवाटारको फोहोर नउठाउने भनेर जेजसरी उहाँले सामाजिक सञ्जालमा लेख्नुभएको छ। त्यो अराजकता हो भन्ने विषयमा हामीले गम्भीर रुपमा छलफल गरेका छौं। त्यसैगरी उहाँको ध्यानाकर्षण गराउने कुरा पनि भएको छ।'

मेयर बालेनले संघीय सरकारका १४ वटा मन्त्रालयले विभिन्न काम अघि बढाउन सहयोग नगरेको भन्दै गत आइतबारबाट सिंहदरबार, शीतल निवास र मन्त्री क्वार्टरको फोहोर उठाउन बन्द गर्ने घोषणा गरेका थिए।