नेकपा एसलाई धारे हात लगाएर नेता मुकुन्द न्यौपानेले गरे पार्टी परित्याग

काठमाडौं– नेकपा एकीकृत समाजवादीका वरिष्ठ नेता मुकुन्द न्यौपानेले पार्टी त्यागेका छन्। शनिबार काठमाडौंमा पत्रकार सम्मलेन गर्दै नेकपा एसले परिचय दिए पनि पहिचान दिन नसकेको बताएर नेता न्यौपानेले पार्टी छाडेका हुन्।

नेकपा एस अवसरवादमा लिप्त भएको उनको आरोप छ। उनले सांसदका लागि झगडा गर्ने, सांसद पाउनासाथ मन्त्री पाउन लफडा गर्ने, जति खाए पनि नअघाउने प्रवृत्तिका मानिस मात्रै माधवकुमार नेपाल नेतृत्वको पार्टीमा रहेको उनले दाबी गरे।

नेकपा एस त्यागेपछि देशभरका नेता कार्यकर्ता समेटेर एमालेमा समाहित हुने उनले जानकारी दिए। नेकपा एसका नेता झलनाथ खनालसमेत सम्मानित पद दिए एमालेमै फर्किने मनस्थितिमा रहेको उनले खुलासा गरे।