बेलुकी ५ बजे सार्वजनिक गरिँदै सरकारको न्यूनतम साझा कार्यक्रम

काठमाडौं– सरकारको न्यूनतम साझा कार्यक्रम बेलुकी ५ बजे सार्वजनिक गरिने भएको छ। बिहीबार प्रधानमन्त्रीको सरकारी निवास बालुवाटारमा बसेको दस दलीय सत्ता गठबन्धन बैठकले यस्तो निर्णय गरेको हो। 

बैठकपछि सञ्चारकर्मीसँग कुरा गर्दै सत्तारुढ माओवादी केन्द्रका महासचिव देवप्रसाद गुरुङले गठबन्धन दलहरूबीच सरकारको न्यूनतम साझा नीति तथा कार्यक्रमबारे सैद्धान्तिक र नीतिगत विषयमा सहमति जुटेको जानकारी दिए। 

उनले भने, ‘आज सत्ता गठबन्धन दलहरूबीच सरकारको न्यूनतम साझा नीति तथा कार्यक्रमबारे सैद्धान्तिक र नीतिगत विषयमा छलफल भयो। मोटामोटी रुपमा सहमति भएको छ। सानातिना सुझाव केही भए बेलुकी ५ बजेसम्म दिन सकिनेछ। लोकतन्त्र, राष्ट्रियता, जनजीविकासँग जोडिएका विषय र सुशासनबारेमा मूल सहमति भएको हो।’

बैठकमा मन्त्रिपरिषद्लाई पूर्णता दिने विषयले प्रवेश नपाएको उनको भनाइ छ।

न्यूनतम साझा कार्यक्रम तय गर्न कांग्रेसबाट रमेश लेखक, नेकपा माओवादी केन्द्रबाट शक्तिबहादुर बस्नेत, जसपाबाट राजेन्द्र श्रेष्ठ र नेकपा एकीकृत समाजवादीबाट विजय पौडेल सम्मिलित कार्यदल गठन भएको थियो। 

आज कार्यदलले तयार पारेको प्रतिवेदन गठबन्धन बैठकबाट अनुमोदन भएको हो।