उपनिर्वाचन: आज उम्मेदवारको अन्तिम नामावली प्रकाशन तथा चुनाव चिन्ह प्रदान गरिने

काठमाडौं- बैशाख १० गते हुने उपनिर्वाचनका उम्मेदवारको अन्तिम नामावली प्रकाशन हुँदैछ।

गत २१ गते उम्मेदवारका बिरुद्धमा परेको उजुरी हिजो मंगलवार छानबिन सकिए पछि आज अन्तिम नामावली सार्वजनिक गरिन लागिएको हो। आजै उम्मेदवारलाई चुनाव चिन्ह पनि प्रदान गरिनेछ। 

निर्वाचन आयोगले यसअघि सार्वजनिक गरेको कार्यतालिका अनुसार गत चैत २० गते उम्मेदवारी दर्ता गराएका उम्मेदवारको कानुनी हैसियत प्राप्त गरी उपनिर्वाचनका लागि योग्य भएका नाम सार्वजनिक गरिनेछ।

चितवन–२, बारा–२ र तनहुँ–१ मा हुन गईरहेको उपनिर्वाचनका लागि ६९ जनाले उम्मेदवारी दर्ता गराएका छन्। जसअनुसार बारा–२ मा १२ वटा राजनीतिक दलका र २४ जना स्वतन्त्रसहित ३६ जनाले उम्मेदवारी दर्ता गराएका थिए भने चितवन–२ मा १२ जना स्वतन्त्रसहित १२ जना राजनीतिक दलका उम्मेमदवारसहित २४ जनाले उम्मेदवारी दर्ता गराएका छन्। उता, तनुहँ–१ मा ९ वटा राजनीतिक दलकातर्फवाट उम्मेदवारी दर्ता गराएका छन्।

उता, चितवन क्षेत्र नम्बर-२ का उम्मेदवार रवि लामिछानेको उम्मेदवारी कायम भएको छ। लामिछानेविरुद्ध परेका ४ वटा उजुरी मध्ये तीन वटा उजुरीमा दावी नपुगेको निष्कर्ष निकाल्दै मुख्य निर्वाचन अकिकृतको कार्यालयले उनको उम्मेदवारी कायम राख्ने निर्णय गरेको हो। तर, युवराज पौडेल ‘सफल’ले दिएको उजुरीमा निर्वाचन आयोगले नै निर्णय गर्ने भएको छ, जुन उजुरीको जवाफ दिन लामिछानेलाई ७ दिनको समय दिइएको छ।