विराटनगरमा प्रदेश नामकरण, धरानमा तालाबन्दी

काठमाडौं– साविक प्रदेश १ को नाम कोसी राखिएपछि नामकरण खारेजी माग गर्दै आएका विभिन्न जातजातिका संघ–संस्थामा आबद्ध पहिचानवादी आन्दोलनकारीले धरान उपमहानगर कार्यालयसहित २० वटै वडामा ताला लगाइदिएका छन्।

बिहीबार किरात याक्थुङ चुम्लुङ, किरात राई यायोक्खा, नेपाल आदिवासी जनजाति महासंघलगायतले विराटनगरको रिस धरान उपमहानगरमा ताला लगाएर पोखेका हुन्।

आन्दोलनकारीले उपमहानगर कार्यालयमा ताला लगाउनुअघि कर्मचारीलाई बाहिर निकालेका थिए। आन्दोलनकारीले उपमहानगरको मुख्य प्रवेशद्वारमा विरोधस्वरुप तालाबन्दीसहित कोणसभा गरेर उपमहानगरले प्रयोगमा ल्याउन थालेको कोसी प्रदेश लेखिएको लेटरप्याड र छापसमेत जलाइदिएका छन्।