तनहुँ १ र चितवन २ मा तोकिए कांग्रेस उम्मेदवार

काठमाडौं– कांग्रेसले १० वैशाखमा तोकिएको उपनिर्वाचनका लागि उम्मेदवारी टुंग्याएको छ। बिहीबार कांग्रेस मुख्यालय सानेपामा बसेको कांग्रेस केन्द्रीय कार्यसम्पादन समिति बैठकले तनहुँ १ मा केन्द्रीय सदस्य गोविन्द भट्टराई र चितवन २ मा जीतनारायण श्रेष्ठलाई उम्मेदवार बनाउने निर्णय गरेको हो।

बैठकमा बारा २ का विषयमा छलफल नभएको कांग्रेस नेता एनपी साउदले बताए। बारा २ मा सत्ता गठबन्धनले उपेन्द्र यादवलाई जसपाबाट साझा उम्मेदवार बनाउने बताइएको छ।

तनहुँ १ बाट निर्वाचित रामचन्द्र पौडेल राष्ट्रपति र बारा २ बाट निर्वाचित रामसहायप्रसाद यादव उपराष्ट्रपति भएपछि सो क्षेत्रमा उपनिर्वाचन हुन लागेको हो। 

रास्वपाका रवि लामिछाने नागरिकता विवादमा दोषी ठहर भएपछि चितवन २ मा पनि उपनिर्वाचन हुन लागेको हो। त्यसका लागि २० चैतमा मनोनयन दर्ता गरिँदै छ।