कांग्रेसबाट तनहुँ १ मा सांसद बन्न १३ जनाको आवेदन

काठमाडौं– आगामी १० वैशाखमा तय भएको तनहुँ १ को उपनिर्वाचनका लागि कांग्रेसका १३ जनाको आवेदन परेको छ।
तनहुँ १ रामचन्द्र पौडेल राष्ट्रपतिमा निर्वाचित भएपछि रिक्त रहेको निर्वाचन क्षेत्र हो। उक्त स्थानमा उपनिर्वाचन हुँदै छ।

कांग्रेस प्रतिनिधिसभा सदस्य क्षेत्रीय कार्यसमितिले आवेदन माग गरेको अन्तिम दिन शनिबारसम्म १३ जनाले दरखास्त हालेका हुन्। 

शुक्रबार ६ जना र शनिबार सात जनाले उम्मेदावारी दिएको कांग्रेस क्षेत्रीय सचिव दयानिधि नरालले बताए। कांग्रेस केन्द्रीय सदस्य गोविन्द भट्टराई, पूर्वजिल्ला सभापति रघुनाथ पौडेल, महाधिवेशन प्रतिनिधि रामचन्द्र अधिकारी, दीपक भट्टराई, लक्ष्मी आचार्य र आँबुखैरेनी सभापति विष्णु पन्तले तनहुँ १ बाट उम्मेदवार हुन आवेदन दिएका छन्।

यस्तै, संविधानसभा सदस्य रामचन्द्र पोख्रेल, कांग्रेस तनहुँका उपसभापति देवकुमार श्रेष्ठ, क्षेत्रीय सभापति श्यामकुमार मौरती, पूर्वसचिव समुद्र गोदार, नेताहरु डोबाटे विश्वकर्मा, सरिता गुरुङ र अर्जुनबहादुर अधिकारीले आवेदन दिएका छन्।