कोसी प्रदेश नाम खारेजी आन्दोलनमा भएको मृत्यु घटनाबारे छानबिन समिति गठन हुने

काठमाडौं– साविक प्रदेश १ को नाम कोसी राखिएसँगै विरोधमा उत्रिएका एक प्रदर्शनकारीको मृत्यु भएपछि केन्द्र सरकारले उक्त घटना छानबिन गर्ने भएको छ।

कोसी प्रदेश खारेज गरेर जातीय, सांस्कृतिक नाम राख्नुपर्ने माग गर्दै विभिन्न जातजाति निकट संघ–संगठनले गत ५ चैतमा विरोध प्रदर्शन गर्दा प्रहरीको कुटाइबाट एक जना प्रदर्शनकारीको मृत्यु भएको थियो।

कोसी नामकरणविरुद्धमा गत ५ चैतमा भएको प्रदर्शनका क्रममा सुरक्षाकर्मीको लाठी प्रहारबाट पदम लिम्बू लाजेहाङको मृत्यु भएको थियो। लाठी प्रहारबाट गम्भीर घाइते लिम्बूको शुक्रबार बिहान उपचारका क्रममा निधन भएको हो। 

कोसी प्रदेश नामकरणमा देखिएको विवादपछिको घटनाक्रमप्रति सरकार गम्भीर रहेको प्रधानमन्त्री पुष्पकमल दाहाल प्रचण्डले बताएका छन्।

५ चैतको घटना सम्बन्धमा गृह मन्त्रालयले समिति गठन गरी तत्काल छानबिन अघि बढाउने निर्णय भएको सञ्चारमन्त्री एवं सरकारका प्रवक्ता रेखा शर्माले जानकारी दिइन्।