संविधानको अभ्यासलाई प्रभावित हुन नदिने राष्ट्रपति रामचन्द्रको प्रतिबद्धता

काठमाडौं– राष्ट्रपति रामचन्द्र पौडेलले संविधान  र शासन व्यवस्थाको अभ्यास प्रभावित हुने नदिने गरी निष्पक्ष, तटस्थ र विधि पालनामा प्रतिबद्ध रहने बताएका छन्। शनिबार संघीय संसद् र सात वटै प्रदेशसभा सदस्यको सम्मानमा शीतलनिवासमा आयोजना गरिएको चियापान कार्यक्रमलाई सम्बोधन राष्ट्रपति पौडेलले यस्तो बताएका हुन्। 

राष्ट्रपतिका काम, कर्तव्य तथा जिम्मेवारी वहन गर्दा संविधान प्रदत्त मर्यादा तथा संविधानका अक्षर र भावनालाई आत्मसात् गरी दिगो शान्ति, सुशासन, विकास र समृद्धिको आकांक्षा पूरा गर्ने राष्ट्रिय अभियानमा समर्थन रहने उनको धारणा छ।

संविधान निर्माण गर्ने प्रक्रियामा समेत सहभागी रहेर काम गर्ने अवसर प्राप्त गरेको कारणले पनि राष्ट्रपतिलाई दिएको काम, कर्तव्य र अधिकारप्रति सचेत रहने विश्वास उनले दिलाए।

निर्वाचित जनप्रतिनिधिले संविधान र कानुनको मर्म र भावनालाई अंगीकार नगरी शासन सञ्चालन गर्दा व्यक्ति मात्र नभएर संस्थाप्रति समेत नागरिकका आस्था र विश्वास गुम्दै जाने अवस्था आउन नदिन उनले सबैलाई सचेत गराए।

राष्ट्रपति पौडेलले भने, ‘लोकतान्त्रिक शासन व्यवस्थामा लोकतान्त्रिक संस्थाहरू बलिया र  कानुनसम्मत भएनन् भने त्यस्ता संस्थाप्रति नागरिकका विश्वास धर्मराउने र व्यवस्थाप्रति वितृष्णा जाग्न सक्ने हुँदा यसतर्फ सजग रहन जरुरी छ।’