नजिकबाट चिनौं राष्ट्रपति रामचन्द्र पौडेललाई

काठमाडौं- नेपालको सम्मानित पद मानिने राष्ट्रपतिमा निर्वाचित रामचन्द्र पौडेलले सोमबार सपथ लिएसँगै कार्यभार सम्हालिसकेका छन्।

राष्ट्रपति रामचन्द्र पौडेलको जन्म आमा ऋषिमाया र बुबा दुर्गाप्रसाद पौडेलबाट २९ असोज २००१ मा तनहुँको साविक मिर्लुङ बाहुनपोखरामा भएको हो। पौडेलका श्रीमती सविता पौडेल तथा चार छोरी (शर्मिला, संज्ञा, अनुज्ञा र अवज्ञा) र एक छोरा (चिन्तन) छन् ।    

मध्यमवर्गीय किसान परिवारमा जन्मिएका पौडेलको स्थायी बसोबास तनहुँको व्यास–८ बेलथुम्की हो। हाल काठमाडौं महानगर–१६ बोहोराटारमा बस्दै आएका पौडेलले शास्त्री (संस्कृत साहित्य, २०२४) र स्नातकोत्तर तह (नेपाली साहित्य २०२७) उत्तीर्ण गरेका छन्। राष्ट्रपति पौडेललाई अध्ययनशील, बौद्धिक, सादगी, जुझारु एवं संघर्षशील व्यक्तिका रूपमा लिइने गरेको छ।    

२०१६ मा पोखरामा हिमालयन छात्र संघ स्थापना गरेका पौडेल पोखरा विन्ध्यवासिनी पाठशालामा अध्ययन गर्दै गर्दा २०१७ जेठ÷असारमा नेपाल संस्कृत छात्र संघको काठमाडौं अधिवेशनका लागि प्रतिनिधि भएका थिए। १ पुस २०१७ मा जननिर्वाचित संसद् भंग गरी प्रधानमन्त्री बिपी कोइरालालगायत नेतालाई जेलमा राखिएकामा त्यसको विरोध गर्दै पौडेल प्रजातान्त्रिक आन्दोलनमा सहभागी भए।   

२०१९ मा नेपाल संस्कृत विद्यार्थी संघको सचिवको हैसियतले २०१९–२०२० मा भएको उपत्यकाव्यापी विद्यार्थी आन्दोलनमा र २०२०–२०२१ मा राष्ट्रव्यापी स्वतन्त्र विद्यार्थी आन्दोलनमा पौडेल गिरफ्तारीमा परेका थिए।

नेपाली कांग्रेस तनहुँको जिल्ला सदस्य (२०३४) र जिल्ला उपसभापति (२०३६) को जिम्मेवारी सम्हालेका पौडेल जनमत संग्रहको सिलसिलामा बहुदलीय व्यवस्थाको प्रचार–प्रसार गर्न गठित कांग्रेस तनहुँ जिल्ला समितिको संयोजक (२०३७), कांगे्रस केन्द्रीय सदस्य तथा प्रचार विभाग प्रमुख (२०४०) र २०४३ मा कांग्रेस केन्द्रीय सदस्य भएका थिए।    

कांगे्रस पार्टीको केन्द्रीय महामन्त्री (२०६२–२०६४), केन्द्रीय उपसभापति (२०६४–२०७२) र कांग्रेस संसदीय दलको नेता (२०६४–२०७०) भएका पौडेल २०७२ मा कांगे्रस कार्यवाहक सभापति भएका थिए। भरतपुर कब्जा गर्ने कांग्रेसको सशस्त्र संघर्षमा संलग्न भएको आरोपमा २०१८ मा काठमाडौंबाट गिरफ्तार भई पहिलो पटक करिब एक महिना हिरासत सजाय भोगेका पौडेल विद्यार्थी आन्दोलनका क्रममा पटक–पटक पक्राउ परेका थिए। विद्यार्थी आन्दोलनसहित कांग्रेस पार्टीको जिल्लादेखि केन्द्रसम्म विभिन्न पदमा रही नेतृत्वदायी भूमिका निर्वाह गर्ने क्रममा पौडेलले १४ वर्षभन्दा बढी जेलजीवन व्यतीत गरेका थिए।    

पौडेल २०४८ मा तनहुँ १ बाट प्रतिनिधिसभा सदस्य निर्वाचित भएका थिए भने त्यसपछि तनहुँ २ बाट २०५१, २०५६, २०६४ र २०७० मा लगातार प्रतिनिधिसभा निर्वाचन तथा संविधानसभा निर्वाचनमा निर्वाचित भएका थिए।

गत ४ मंसिरको प्रतिनिधिसभा सदस्य निर्वाचनमा उनी तनहुँ १ बाट निर्वाचित भएका थिए।  पौडेल पहिलो पटक २०४८ मा स्थानीय विकासमन्त्री, २०४९ मा कृषिमन्त्री र २ पुस २०५१ मा प्रतिनिधिसभाको सभामुखमा निर्वाचित भएका थिए। उनले २०५६ र त्यसपछि उपप्रधानमन्त्री तथा सूचना/सञ्चारमन्त्री, स्थानीय विकासमन्त्री, उपप्रधानमन्त्री तथा गृहमन्त्रीका साथै शान्ति समितिको संयोजक (२०६१–०६२), शान्ति तथा पुनःनिर्माणमन्त्री (२०६३–०६४), कांग्रेस संसदीय दलको नेता तथा संसद्मा प्रमुख प्रतिपक्षी दलको नेता (२०६४–०७०)समेत जिम्मेवारी सम्हालेका थिए। 

पौडेलले मानव अधिकारसम्बन्धी विभिन्न पुरस्कार, महेन्द्रविक्रम शाह पुरस्कार (महेन्द्रविक्रम शाह नेपाल प्रजातन्त्र कांग्रेसका संस्थापक हुन्न्), जापान सरकारले प्रदान गरेको राजकीय सम्मान ‘अर्डर अफ द राइजिङ सन्’को सम्मान (सन् २०२०) लगायत सम्मान तथा पुरस्कार प्राप्त गरिसकेका छन्।    

यसैगरी सशस्त्र द्वन्द्वरत तत्कालीन नेकपा माओवादीलाई मूल प्रवाहको राजनीतिमा ल्याउने ऐतिहासिक वार्ता र सहमतिका काममा अग्रणी भूमिका निर्वाह गरेका पौडेल विस्तृत शान्ति सम्झौताका मस्यौदाकार तथा सहमति र सहकार्यका पक्षपातीसमेत रहेका छन्।