सांसदबाट राजीनामा दिए राष्ट्रपति पौडेलले

राष्ट्रपति रामचन्द्र पौडेलले राष्ट्रपति पदमा निर्वाचित भएपछि प्रतिनिधिसभा सदस्यबाट राजीनामा दिएका छन्। उनी यही फागुन २५ गते राष्ट्रपति पदमा निर्वाचित भएका थिए। उनले आज पद तथा गोपनियताको शपथ लिएका छन्। 

राष्ट्रपति पौडेलले सभामुखलाई पत्राचार गर्दै नेपालको संविधानको धारा ६२ (६) बमोजिम प्रतिनिधिसभा सदस्यको राजनीतिक पद स्वतः रिक्त हुने व्यहोरा जानकारी गराएका छन्।

साथै उनले सभामुख, संघीय संसद् सचिवालय, तनहुँ निर्वाचन क्षेत्र नं १ का मतदाता, जिल्लावासी तथा शुभेच्छुकहरुबाट आजसम्म प्राप्त साथ र सहयोगप्रति आभार प्रकट गरेका छन्।

गत मंसिर ४ गते भएको निर्वाचनमा उनी तनहुँ क्षेत्र नम्बर १ बाट निर्वाचित भएका थिए। सो क्षेत्रमा अब उपनिर्वाचन हुनेछ।