ए डिभिजन लिग: मछिन्द्र लगातार दुई खेलमा पराजित

काठमाडौं- सहिद स्मारक ए डिभिजन लिगको साविक विजेता मछिन्द्र क्लब लगातार दुई खेलमा पराजित भएको छ। बिहीबार दिउँसो च्यासल रंगशालामा हार बेहोरेसँगै मछिन्द्रले सुरुआति दुवै खेलमा हार बेहोरेको हो।

पहिलो खेलमा जावलाखेलसँग हार बेहोरेको मछिन्द्रले आजको खेलमा भने त्रिभुवन आर्मीसँग २–० को हार बेहोरेको छ। मछिन्द्रविरुद्ध दिपक गुरुङ र नवयुग श्रेष्ठले समान १–१ गोल गरेका थिए।

पहिलो हाफमा दुवै टिमले गोल नगरे पनि दास्रो हाफमा आर्मीले दुई गोल गरेको थियो। यो जितपछि आर्मीले दोस्रो खेलमा पहिलो जित निकालेको छ। उसले दुई खेलबाट चार अंक बनाएको छ।

आजै भएको अर्को खेलमा भने जावलाखेल युथ क्लबले एनआरटीलाई २–१ ले हराउँदै लगातार दोस्रो जित निकालेको छ। जावलाखेललाई जित दिलाउन सिमान्त थापा र फोडे फोफानाले गोल गरेका थिए। एनआरटीका सन्जिव विष्टले एक गोल फर्काए।