राष्ट्रपति निर्वाचनले बानेश्वर क्षेत्रमा अचाक्ली जाम

मुलुकको तेस्रो राष्ट्रपतिका लागि अहिले मतदान भइरहेको छ। नयाँ बानेश्वरस्थित संघीय संसद् भवनमा बिहान १० बजे सुरु भएको मतदान अपराह्न ३ बजे सकिनेछ।

राष्ट्रपति निर्वाचनका लागि मतदाता हुन् संघीय र प्रदेश सांसद। संघीय संसद्का दुवै सदन र सातै प्रदेशका सांसदले अहिले मतदान गरिरहेका छन्। मतदानका लागि सबै प्रदेशबाट हिजै सांसदहरु काठमाडौं आइपुगेका थिए। राष्ट्रपति निर्वाचनका लागि करिब ९ सय मतदाता छन्।

यसैबीच मतदानका कारण नयाँ बानेश्वर क्षेत्रमा सवारी व्यवस्थापन अस्तव्यस्त बनेको छ। मतदाताका सवारीसाधन र भीआईपी सवारीका कारण बानेश्वर क्षेत्रमा छिचोलि नसक्नु जाम छ।

३ बजेसम्म मतदान हुने र लगत्तै मतगणना पनि हुने भएकाले साँझसम्म नै यातायात प्रभावित हुने ट्राफिक प्रहरीले जानकारी दिएको छ।