आफूलाई भोट हालेपछि रामचन्द्रले भने- राजा र राष्ट्रपतिबीचको फरक देखाउँछु

राष्ट्रपतिका उम्मेदवार रामचन्द्र पौडेलले गणतन्त्रको सुदृढीकरणका लागि आफूले संरक्षकको भूमिका निर्वाह गर्ने बताएका छन्।

संसद् भवनमा आज पत्रकारहरुसँग संक्षिप्त कुरा गर्दै पौडेलले गणतन्त्र स्थापनामा आफूले भूमिका खेलेको र यसको सुदृढीकरणका लागि संरक्षकको भूमिका खेल्ने बताएका हुन्।

पौडेलले भने, ‘राजतन्त्रको राष्ट्राध्यक्ष र गणतन्त्रको राष्ट्राध्यक्ष कस्तो हुन्छ भनेर म देखाउनेछु। केही दिनमै निर्वाचित भएमा तपाईं (पत्रकार)हरुलाई पनि बोलाउने छु।’ पौडेलले आफू राष्ट्रपतिमा निर्वाचित भए सर्वसाधारणले दुःख पाउने गरी कुनै काम नगर्ने बताए।

आज राष्ट्रपतिको निर्वाचन हुँदैछ। निर्वाचनमा कांग्रेसका पौडेल र एमालेबाट सुवासचन्द्र नेम्वाङ प्रतिस्पर्धामा छन्। बिहान १० बजे सुरु भएको मतदान अपराह्न ३ बजे सकिनेछ। पहिलो मतदान उम्मेदवार पौडेलले नै गरेका थिए। अर्का उम्मेदवार नेम्वाङले पनि मतदान गरिसकेका छन्।