राष्ट्रपतिमा भोट माग्दै लोसपा कार्यालय पुगे नेम्बाङ

काठमाडौं– राष्ट्रपति उम्मेदवारका प्रत्यासी एमाले नेता एवं उपाध्यक्ष सुवास नेम्बाङ भोट माग्दै लोकतान्त्रिक समाजवादी पार्टी मुख्यालय पुगेका छन्।

शुक्रबार सचिव योगेश भट्टराई र सांसद भगवती चौधरीसहितका नेतालाई सँगै लिएर राष्ट्रपतिमा भोट दिन आग्रह गर्दै नेम्बाङ लोसपा मुख्यालय बबरमहल पुगेका हुन्।

लोसपा अध्यक्ष महन्थ ठाकुरले पार्टी बैठकपछि सल्लाह गरेर राष्ट्रपतिमा मतदान गर्ने निर्णयबारेको जानकारी दिइने बताएको सचिव भट्टराईको भनाइ छ।

भट्टराईले आठ दलीय गठबन्धन स्थायी नभएकाले राष्ट्रपतिमा नेम्बाङको जित हुने विश्वास व्यक्त गरे। एमालेले अब नागरिक उन्मुक्ति र जनमत पार्टीसँग पनि राष्ट्रपतिमा मत दिन आग्रह गर्नेछ।