चार दलको संयुक्त बैठक बस्दै, टु‌गो लगाउलान् राष्ट्रपतिको साझा उम्मेदवार?

राष्ट्रपतिको उम्मेदवार टुंगो लगाउन नेपाली कांग्रेस, नेकपा (माओवादी केन्द्र), नेकपा (एकीकृत समाजवादी) र जनता समाजवादी पार्टीको संयुक्त बैठक बस्ने भएको छ। आज साँझ ६ बजे प्रधानमन्त्रीको सरकारी निवास बालुवाटारमा दलहरुको संयुक्त बैठक बस्न लागेको हो। 

बैठकमा राष्ट्रपति निर्वाचन र पुरानो पाँच दलीय गठबन्धन ब्युँताउने विषयमा छलफल हुने बताइएको छ। राष्ट्रपतिको उम्मेदवारी मनोनयन गर्ने दिन नजिकिँदै गर्दा दलहरुले छलफललाई तिव्रता दिएका छन्। फागुन २५ गते हुने राष्ट्रपति निर्वाचनका लागि शनिबार उम्मेदवारी मनोनयन हुँदैछ।

हिजो बुधबार बेलुका प्रधानमन्त्री निवास बालुवाटारमा भएको कांग्रेस र माओवादीको बैठकमा पुरानो पाँच दलीय गठबन्धन ब्युँताउने अनौपचारिक सहमति भएको थियो। उक्त सहमतिलाई अन्तिम रुप दिन थप दुई दलसहितको संयुक्त बैठक बस्न लागेको हो।

चार दलको बैठकअघि माओवादी, नेकपा एस र जसपाको बैठक बस्ने तय भएको छ। आजै नेकपा एसका अध्यक्ष र माओवादी अध्यक्ष प्रचण्डबीच पनि भेट भएको थियो।