राष्ट्रपति निर्वाचनबारे खुलेनन् माधव नेपाल, भने- कतिपय कुरा पर्दाभित्रै रहेको राम्रो

नेकपा (एकीकृत समाजवादी) का अध्यक्ष माधवकुमार नेपालले आफूलाई राष्ट्रपति बन्ने ठोस प्रस्ताव नआएको बताएका छन्। मंगलबार दाङको भालुवाङमा आयोजित पत्रकार भेटघाट कार्यक्रममा अध्यक्ष नेपालले बाहिर हल्ला आएजस्तो आफूलाई कुनै प्रस्ताव नआएको बताएका हुन्। 

उनले भने, 'म आफैंले पनि राष्ट्रपति बन्ने कि नबन्ने भन्ने विषयमा अझै सोच बनाएको छैन। यद्यपि यो विषयमा विभिन्न दलहरूसँग छलफल भइरहेको छ,' उनले भने।

नेकपा (एमाले) का अध्यक्ष केपी ओलीले राष्ट्रपति बन्न आफूलाई  प्रस्ताव गरेको समाचार बाहिर आए पनि कतिपय कुरा पर्दाभित्र रहन दिँदा नै उपयुक्त हुने उनको भनाइ थियो।उनले भने, `चाहना राख्ने कुरा बेग्लै हो। मैले नै के गर्ने भन्ने सोचिसकेको छैन। हाम्रो पार्टीले पनि के गर्ने भन्ने निर्णय गरिसकेको छैन।’

यसपटक पावर सेयरिङमा आफ्नो भूमिका महत्त्वपूर्ण हुने उल्लेख गर्दै उनले सधैं अरूका लागि बलिदान हुने स्थिति नहुने बताए। राष्ट्रपतिको लागि बृहत् छलफलको आवश्यकता रहेको उनले बताए।