मानव बेचबिखनमा परेका ३० जनाको उद्धार

काठमाडौं– नेपाल प्रहरीको मानव बेचबिखन अनुसन्धान ब्युरोले माघमा मात्रै विभिन्न मुलुकमा बेचबिखनमा परेका ३० जनाको उद्धार गरिएको तथ्यांक सार्वजनिक गरेको छ। 

तीमध्ये भारतबाट मात्रै १५ महिला र चार बालबालिका, कुवेतबाट ६ महिला, ओमनबाट दुई महिला, इराकबाट एक महिला र नेपालभित्रै आन्तरिक बेचबिखनमा परेका दुई जनाको उद्धार गरिएको ब्युरोका निर्देशक प्रहरी वरिष्ठ उपरीक्षक जीवनकुमार श्रेष्ठले बताए।

वैदेशिक रोजगारलगायत विभिन्न बहानामा मानव बेचबिखनका घटना दिनदिनै बढिरहेका छन्। प्रहरीको निगरानी तथा सचेतना अभियानका बाबजुद पनि बेचबिखनका घटना देखिँदै आएका छन्। 

आकर्षक वैदेशिक रोजगारीको बहानामा पर्यटक भिसाको दुरुपयोग गरी विभिन्न दलाल तथा म्यानपावर कम्पनीले भ्रमण भिसामा विदेश जाने कागजातको न्यूनतम प्रक्रियासमेत पूरा नगरी नक्कली कागजात बनाई उनीहरुलाई विदेश पठाएको पाइएको श्रेष्ठको भनाइ छ।

त्यसैगरी विदेश जान लागेको र मानव बेचबिखनको उच्च जोखिममा पर्ने देखिएका २५० जनालाई त्रिभुवन अन्तर्राष्ट्रिय विमानस्थलमा रहेको ब्युरोको प्रहरी टोलीले फिर्ता गराएको पनि उनले जानकारी दिए। 

माघमा मानव बेचबिखन तथा ओसारपसार कसुरको आरोपमा चार जनालाई पक्राउ गरी आवश्यक अनुसन्धान जारी रहेको जनाइएको छ। गत एक महिनामा एक महिला र पाँच पुरुष गरी ६ जनामाथि अनुसन्धान सम्पन्न गरी अदालतमा मुद्दा चलाइएकामा उनीहरु पुर्पक्षका लागि कारागार चलान भएको प्रहरी उपरीक्षक नरहरी रेग्मीले बताए।