पश्चिमी वायुको आंशिक प्रभाव हुँदा कस्तो रहला आजको मौसम?

काठमाडौं- मौसम पूर्वानुमान महाशाखाले हाल देशमा पश्चिमी वायुको आंशिक प्रभाव रहेको जानकारी दिएको छ। अहिले प्रदेश १ का पहाडी भू-भागमा बदली रहेको जानकारी दिँदै महाशाखाले बाँकी भू-भागमा आंशिक बदलीदेखि मौसम सामान्यतया सफा रहेको जनाएको छ।

आगामी २४ घण्टामा तराईका एक/दुई स्थानमा बिहान हुस्सु/कुहिरो लाग्न सक्ने महाशाखाले जनाएको छ। आज प्रदेश १ का पहाडी भू-भागमा आंशिकदेखि सामान्य बदली हुन सक्ने महाशाखाले जानकारी दिएको छ।

आइतबार प्रदेश १ र गण्डकी प्रदेशका उच्च पहाडी तथा हिमाली भू-भागका एक/दुई स्थानमा हल्का हिमपातको सम्भावना रहेको महाशाखाले जानकारी दिएको छ। अन्य स्थानको मौसम भने सामान्यतया सफा रहने महाशाखाले जनाएको छ।

सोमबार पहाडी भू-भागमा आंशिकदेखि सामान्य बदली हुने तथा प्रदेश १ र गण्डकी प्रदेशका उच्च पहाडी तथा हिमाली भू-भागका केही स्थानमा हल्का हिमपात हुन सक्ने महाशाखको पूर्वानुमान छ।