बालाजु वृत्तको नयाँ डीएसपीमा कुँवरलाई खटाइयो

काठमाडौं- प्रहरी वृत्त बालाजुमा कार्यरत प्रहरी नायव उपरीक्षक (डीएसपी) रविन विष्टको जिम्मेवारी खोसिएको छ।

काठमाडौं उपत्यका प्रहरी कार्यालय रानीपोखरीका प्रवक्ता एसएसपी हिमालयकुमार श्रेष्ठका अनुसार डीएसपी विष्टको ठाउँमा डीएसपी मनोजित कुँवरलाई पठाइएको छ।

सोमबार यातायात मजदुरले नयाँ बसपार्क क्षेत्रमा आन्दोलन गर्दा डीएसपी विष्ट चढ्ने गाडीलगायत प्रहरीका दुई भ्यानमा आगजनी भएको थियो। सो बेला सुरक्षा मजबुत बनाउन नसकेको भन्दै विष्टलाई जिम्मेवारीबाट हटाइएको हो। उनलाई रानीपोखरी तानिएको छ।