हात्तीलाई थापेको पासोमा परेर मानिसको मृत्यु

झापा- हात्तीको आक्रमण रोक्न थापेको विद्युतीय धरापमा परेर झापामा एकको मृत्यु भएको छ। विद्युतीय धरापमा परेर  बिर्तामोड नगरपालिका-७  बाह्रघरेका ४९ वर्षीय खेम श्रेष्ठको शुक्रबार राति मृत्यु भएको जिल्ला प्रहरी कार्यालय झापाले जनाएको छ।

प्रहरीका अनुसार श्रेष्ठले जंगली हात्तीबाट जोगिन घरवरिपरि धराप राखेका थिए। राति पिसाब गर्न निस्किँएका बेला उनी आफैंले राखेको विद्युतीय धरापमा परेका थिए। गम्भीर घाइते उनको उपचारका क्रममा मृत्यु भएको पारिवारिक स्रोतले जनाएको छ।