बारामा दुई मोटरसाइकल ठोक्किँदा एक जनाको मृत्यु, दुई घाइते

काठमाडौं- बाराको सिम्रौनगढ नगरपालिका–५ मा दुई मोटरसाइकल आपसमा ठोक्किँदा एकजनाको मृत्यु भएको छ। दुईजना घाइते छन्।

टेटाबाट सिम्रौनगढ बजारतर्फ जाँदै गरेको ना१प ६८८८ नम्बरको मोटरसाइकल र विपरीत दिशाबाट आउँदै गरेको ना१८प ५१४१ नम्बरको मोटरसाइकल हिजो साँझ करिब ६ बजे ठोक्किएका थिए।

दुर्घटनामा गम्भीर घाइते भएका ६८८८ नम्बरको मोटरसाइकलका चालक महावीर साह कानुको उपचारका क्रममा नगर अस्पतालमा मृत्यु भएको प्रहरीले जनाएको छ।

प्रहरीका अनुसार घाइते भएका कानुकी १३ वर्षीया नातिनी प्रियाशुं र अर्का मोटरसाइकलका चालकको सोही अस्पतालमा उपचार भइरहेको छ।