'शिक्षकले पिटेको पीर'मा विद्यार्थीले गरिन् आत्महत्या

झापाको गौरीगञ्जमा कक्षा ११ पढ्ने एक छात्राले आत्महत्या गरेकी छन्। शिक्षकले ती छात्रालाई कुटपिट गरेपछि उनले आत्महत्या गरेको विद्यार्थी तथा अभिभावकले बताएका छन्।

गौरीगञ्ज माविमा कक्षा ११ मा अध्ययनरत सोनी राजवंशीले आत्महत्या गरेकी हुन्। हिजो मंगलबार स्कुलबाट घर फर्केलगत्तै आत्महत्याको प्रयास गरेकी उनलाई तत्कालै उद्धार गरी अस्पताल पुर्‍याइए पनि अस्पतालले मृत घोषित गरेको थियो। यही घटनालाई लिएर बुधबार बिहानैदेखि गौरीगञ्ज अशान्त बनेको छ।

प्रत्यक्षदर्शी विद्यार्थीहरूका अनुसार मंगलबार विद्यालयमा केटा साथीसँग बसेको निहुँमा शिक्षक पवन दासले उनलाई लट्ठीले कुटपिट गरेका थिए भने अर्का शिक्षक नितेश कटुवालले त्यसको भिडियो बनाएका थिए।

यही कारण सोनी आत्महत्या गर्न विवश भएको आरोप मृतकका आफन्तको छ। पीडितका आफन्त र कक्षा ११ का विद्यार्थीहरूले आरोपित शिक्षक पक्राउको माग गर्दै बुधबार बिहान इलाका प्रहरी कार्यालयमा धर्ना दिएका थिए भने शिक्षक पवन दासको घरमा तोडफोडसमेत गरेका थिए।

आरोपित शिक्षकलाई पक्राउ गरी अहिले इलाका प्रहरी कार्यालय दमकमा ल्याइएको जिल्ला प्रहरी कार्यालयले जनाएको छ।