छुट्टाछुट्टै स्थानमा लडेर पाँचथरमा दुई जनाको मृत्यु

पाँचथर- भीर र रुखबाट लड्दा सोमबार साँझ पाँचथरको फिदिमका दुई जनाको मृत्यु भएको छ। मृत्यु हुनेमा फिदिम–१३ लुङरुपाका ३८ वर्षीय मनोज नेम्वाङ  (सोम) र कुम्मायक ३ का ३९ वर्षीय गजेन्द्र सम्बाहाम्फे छन्।

उनीहरूमध्ये नेम्वाङको भीर र सम्बाहाम्फेको रुखबाट लडेर ज्यान गएको हो। नेम्वाङ फिदिम ७ को नाङलापा भन्ने स्थानमा भीरबाट लडेका थिए। त्यस्तै सम्बाहाम्फेको घाँस काट्ने क्रममा फिदिम-५ मा रुखबाट लडेको जिल्ला प्रहरी कार्यालय पाँचथरले जनाएको छ। रुखबाट झर्दा गम्भीर घाइते भएका सम्बाहाम्फेको उपचारका लागि पाँचथर अस्पताल फिदिम ल्याउने क्रममा निधन भएको हो।

कुम्मायक गाउँपालिका ३ रानिगाउँ घर भएका सम्बाहाम्फे फिदिम-५ का रामकुमार तुम्बापोको घरमा कामदारका रुपमा बस्दै आएका थिए।उनीहरूलाई पोस्टमार्टमका लागि पाँचथर अस्पताल ल्याएर मंगलबार आफन्तलाई बुझाइएको पनि प्रहरीले जनाएको छ।