बाक्लो हुस्सुका कारण कैलालीवासीको जनजीवन प्रभावित

धनगढी- कैलालीमा आज बिहानैदेखि बाक्लो हुस्सु लागेको छ। हिजो र आज बिहान शीतलहरसमेत चलेको र बाक्लो हुस्सु लाग्दा कैलालीवासीको जनजीवन प्रभावित बनेको छ।

केही दिन अगाडि वर्षापछि एक दिन मौसम सफा भई घाम लागे पनि त्यसपछि फेरि हुस्सु-कुहिरो लाग्न थालेको हो। हुस्सु लागेपछि फेरि चिसो बढेको छ। पानी परेपछि गर्मी हुने अपेक्षा गरिए पनि फेरि जाडो बढेको धनगढी उपमहानगरपालिका –८ का स्थानीय जगेन्द्र चौधरीले बताउनुभयो।

तराईका केही स्थानहरूमा बिहानीपख हुस्सु-कुहिरो लागेर दैनिक जनजीवन, स्वास्थ्य, सडक तथा हवाई यातायातमा समेत सामान्य प्रभाव पर्न सक्ने मौसम पूर्वानुमान महाशाखाले जनाएको छ। 

महाशाखाले हाल देशमा पश्चिमी वायुको सामान्य प्रभाव रहेको बुलेटिन प्रकाशित गरी जानकारी दिएको छ। यसै गरी, आज र भोलि सुदूरपश्चिमसहित कर्णाली प्रदेशमा आंशिकदेखि सामान्य बद्ली रहने र एक-दुई स्थानमा हल्का वर्षा-हिमपातको सम्भावना रहेको जनाएको छ।