रवि लामिछानेको पक्षमा माइतीघरमा नाराबाजी

काठमाडौं– निवर्तमान उपप्रधान एवं गृहमन्त्री तथा सांसद रवि लामिछानेलाई समर्थन गर्दै माइतीघरमा सर्वोच्च अदालतविरुद्ध नाराबाजी भएको छ। शुक्रबार सर्वोच्चले लामिछानेको नागरिकतासम्बन्धी विवादमा फैसला सुनाउँदै अनागरिक भएको घोषणा गरेको थियो।

शनिबार सर्वोच्चको फैसलाको विरोधमा युवाको एक समूहले काठमाडौंको माइतीघरदेखि बानेश्वरसम्म प्रदर्शन गरेको हो।

प्रदर्शनमा सहभागीले लामिछानेलाई सुनियोजित रुपमा फसाइएको दाबी गरे। लामिछानेले अमेरिकी नागरिकता त्यागेपछि नेपाली नागरिकता सक्रिय गराउन कानुनले तोकेको प्रक्रिया पूरा नगरेको भन्दै सर्वोच्चले सांसद पद खारेज हुने फैसला गरेको थियो।

लामिछानेले सर्वोच्चको फैसलापछि राष्ट्रिय स्वतन्त्र पार्टीको सभापति, सांसद र गृहमन्त्रीसमेत गुमाएका छन्।