आगामी ३० वर्षसम्म उपत्यकाको विद्युत् माग धान्ने संरचना निर्माण गर्दै प्राधिकरण

काठमाडौं– नेपाल विद्युत् प्राधिकरणले काठमाडौं  उपत्यकाको विद्युत् वितरण प्रणालीलाई व्यवस्थित बनाउने लक्ष्यसहित तारकेश्वर नगरपालिकामा उच्च क्षमताको सबस्टेसन निर्माण गरिने बताएको छ। नियमित रूपमा उच्च भोल्टेजको बिजुली आपूर्ति गर्न तथा आकस्मिक रूपमा हुने विद्युत् विच्छेदजस्ता अवरोध न्यूनीकरणका लागि सबस्टेसन निर्माण गर्न लागिएको हो । 

प्राधिकरणले आगामी ३० वर्षसम्म काठमाडौं उपत्यकाभित्र बिजुलीको माग सहजपूर्वक सम्बोधन गर्ने तयारी गरिरहेको छ। प्राधिकरणका कार्यकारी निर्देशक कुलमान घिसिङले त्यसका लागि काठमाडौंमा ‘रिङ सर्किट’ निर्माण गरिने  बताए। 

यस्तै, नदी किनारै किनार १३२ केभी क्षमताका प्रसारण लाइन बनाइने उनको भनाइ छ। उपत्यकाका तीन जिल्ला र काभ्रेमा समेत भरपर्दो र गुणस्तरीय बिजुली प्रवाहका लागि नयाँ सबस्टेसन निर्माण गर्न लागिएको हो। प्रसारण पूर्वाधार तथा सबस्टेसन अभावमा काठमाडौंमा बाध्यकारी लोडसेडिङ हुन सक्ने अवस्था सिर्जना भएको प्राधिकरणको भनाइ छ। 

उपत्यकाभित्र कुल ६६ केभीदेखि २२० केभी क्षमताका प्रसारण लाइन तथा सबस्टेसन निर्माण गर्नुपर्ने भएकाले विद्यमान प्रसारण लाइन तथा सबस्टेसनको संरचनागत सुधार, स्तरोन्नति एवं विस्तार गर्ने तयारी पनि तीव्र गतिमा अगाडि बढाइएको हो। 

सोही क्रममा साविकको जितपुरफेदी गाविस–५ र गोलढुंगा गाविस–३ मा २२०/१३२/६६/११ केभी क्षमताको सबस्टेसन निर्माण गर्न लागिएको छ। सो सबस्टेसन निर्माण गर्न आवश्यक पर्ने जग्गा प्राप्तिका लागि प्राधिकरणले बुधबार सूचना प्रकाशित गरेको छ।