पोखरा विमान दुर्घटना, ६ जनाको शव डीएनएबाट पहिचान

काठमाडौं– गत १ माघमा काठमाडौंबाट पोखरा उडेको यती एयर विमान सेती नदीको खोचमा दुर्घटना हुँदा ७२ जनाको ज्यान गएको थियो। पोखरा हवाई दुर्घटनामा मृत्यु भएकामध्ये ६ जनाको शव पहिचान हुन बाँकी रहेको नागरिक उड्डयन प्राधिकरणले बताएको छ।

काठमाडौं ल्याइएका ४८ मध्ये ६ जनाको शव पहिचान हुन बाँकी रहेको त्रिवि शिक्षण अस्पतालले जनाएको छ। अस्पतालका फरेन्सिकविद् डा. तुलसी कँडेलले फरेन्सिक र फिंगर प्रिन्टबाट ४२ जनाको शव पहिचान गरिएको बताए। ६ जनाको शव अब ‘डिएनए’ परीक्षणबाट पहिचान गरिने उनको भनाइ छ। 

‘६ जनाको शव अत्यधिक जलेको हुनाले हामीलाई फरेन्सिक र फिंगर प्रिन्ट विधिबाट पहिचानमा समस्या भयो। त्यसैले डिएनए विधिबाट पहिचान गर्ने प्रक्रिया सुरु गरेका छौं’, उनले भने।

नेपाल प्रहरीको प्रयोगशालामा शवको ‘डीएनए’ परीक्षण गरिनेछ। उनले डीएनए परीक्षणका लागि मृतक र मृतकका नातेदारको नमुना संकलन गर्ने कार्य भइरहेको जानकारी दिए। यो विधिबाट शव पहिचान गर्न कम्तीमा २२  दिन लाग्नेछ। विमान दुर्घटनाका ४८ शव फरेन्सिक जाँचका लागि काठमाडौं ल्याइएको थियो भने पोखरामा २२ शवको जाँच गरिएको थियो।