पानी र हिउँ नपर्दा म्याग्दी र मुस्ताङका किसान चिन्तित

मुस्ताङ- यस वर्ष समयमै हिउँ र पानी नपर्दा हिमाली जिल्ला म्याग्दी र मुस्ताङका किसान चिन्तित भएका छन्।

यसअघिका वर्षहरूमा मंसिर तेस्रो सातादेखि हिउँ पर्ने म्याग्दीका उच्च पहाडी क्षेत्र तथा मुस्ताङमा यस वर्ष माघ लागिसक्दा पनि हिउँ नपरेपछि बालीनाली सुक्न थालेका छन् भने हिमालहरू काला पत्थरमा परिणत हुँदै गएका छन्।

हिउँदमा पानी नपरेपछि हिउँदे खेती सिँचाइको अभावमा खेतबारीमा नै सुक्दै गएको म्याग्दीका अगुवा किसान चन्द्रबहादुर कार्कीले बताए।

‘पहिला यो समयमा मुस्ताङका खेतबारी र डाँडापाखा हिउँले ढाकिन्थे तर यस वर्ष हिउँ नपर्दा डाँडापाखा उराठलाग्दा र खेतबारी सुक्खा भएको छ‚‘ मुस्ताङ मार्फाका कृषक शोभा गुरुङले जानकारी दिइन्।

म्याग्दी जिल्लाको माथिल्लो क्षेत्रमा गत वर्ष पुस नलाग्दै हिउँ परेको थियो। यस वर्ष माघमा समेत हिउँ नपर्दा आलु, उवा, गहुँजस्ता बाली बारीमै सुक्न थालेको किसानहरू बताउँछन्।

समयमा हिउँ र पानी नपरे पनि यो वर्ष गत वर्षभन्दा धेरै चिसो महसुस भएको उच्च लेकाली क्षेत्रका बासिन्दा बताउँछन्। हिउँ पर्ने समयमा हिउँ नपरेको र तापक्रमसमेत बढ्दै गएकाले यहाँका बासिन्दा चिन्तित छन्।

वनजंगलको तीव्र फँडानी, विभिन्न हानीकारक ग्यासको उत्सर्जनलगायत कारण जलवायुमा परेको असरले वातावरणमा यस्तो परिवर्तन देखापरेको वातावरणविद् चन्द्रमणि सापकोटाले बताए।