लुम्बिनीको सभामुखमा माओवादीका घर्ती निर्विरोध

काठमाडौं- लुम्बिनी प्रदेशको सभामुखमा नेकपा माओवादी केन्द्रका तुलाराम घर्ती निर्विरोध भएका छन्। सोमबार प्रदेशसभा सचिवालयमा उम्मेदवारी दर्ता गर्ने अन्तिम समयसम्ममा उनको मात्र उम्मेदवारी दर्ता भएपछि घर्ती निर्विरोध भएका हुन्। 

उपसभामुखमा भने तीन जनाको उम्मेदवारी दर्ता भएको छ। उपसभामुखमा राप्रपाबाट मेनुका खाण केसी, कांग्रेसका विश्वप्रेम पाठक र नागरिक उन्मुक्ति पार्टीकी निर्मलादेवी चौधरीको उम्मेदवारी दर्ता भएको छ।

सत्ता गठबन्धनमा लुम्बिनी प्रदेशमा मुख्यमन्त्री एमाले, सभामुख माओवादी र उपसभामुख राप्रपाले लिने गरी सहमति भएको थियो। त्यही सहमतिअनुसार एमालेका लिला गिरी मुख्यमन्त्रीमा नियुक्त भइसकेका छन्। 

गठबन्धनले एक मन्त्रालय मात्र दिने तयारी गरेपछि उन्मुक्तिले उपसभामुखमा उम्मेदवारी दिएको हो। सत्ता गठबन्धनमा एमालेका २९, माओवादीका १०, राप्रपाका ४, जसपा, लोसपा र जनमतका ३/३ प्रदेश सभा सदस्य छन्। स्वतन्त्र दुई सदस्य छन्। ८७ सदस्यीय प्रदेश सभामा नागरिक उन्मुक्तिबाहेक पनि सत्ताय गठबन्धनमा ५१ सदस्य छन्।