छायानाथमा दलितसँग लगनगाँठो कस्ने गैरदलितलाई नगद लाख सित्तैमा

मुगु– मुगुको छायानाथ रारा नगरपालिकाले उमेर पुगेका गैरदलितले दलितसँग बिहे गरे १ लाख रुपैयाँ दिने भएको छ। हालै सम्पन्न नगरपालिकाको १२औं नगरसभाले जातीय विभेदविरुद्ध दलित नीति नियमावली पास गर्नुका साथै उमेर पुगेका गैरदलितले दलितसँग विवाह गरे  प्रोत्साहनस्वरूप १ लाख उपलब्ध गराउने भएको हो। 

नगरप्रमुख विष्णुकुमार भामले छुवाछूत अन्त्य र दलितको हकाधिकारका लागि दलित नीति नियमावली, २०७९ सभाबाट बहुमतले पास भएको जानकारी दिए। पालिकाभित्रका १ देखि १४ वडासम्मका १ हजार ३०० दलित घरधुरी छन्। उनले संस्कृति, बाजा र सीपमूलक आर्यआजनका लागि प्रति घरधुरीलाई पहिलो चरणमा २ हजार ५०० का दरले दलित भत्ता उपलब्ध गराइने बताए। यस्तो भत्ता पाँच वर्षे कार्यकालमा ५ हजारसम्म बढाउने लक्ष्य रहेको उनको भनाइ छ।

नगरसभाबाट विभिन्न १० वटा नीति, नियमावली, कार्यविधि र निर्देशिका बहुमतले पारित भएको छ। युवालाई कुलतमा फस्न नदिन नगरस्तरीय सुधारगृह सञ्चालन कार्यविधि २०७९ र  अपांगता नियमावली २०७९ पारित भएको छ। यस्तै, नगर बस सञ्चालन कार्यविधि २०७९, व्यावसायिक दर्ता तथा नवीकरण कार्यनिर्देशिका २०७९, महिला हेल्प डेस्क कार्यविधि, महिलासँग उपप्रमुख कार्यक्रम सञ्चालन कार्यविधि, खानेपानी तथा सरसफाई निर्देशिका नियमावली र विपद् जोखिम न्यूनीकरण नियमावली, २०७९ सभाबाट पारित भएको छ।–न्युज कारखाना