नेपाल आइन् बलिउड अभिनेत्री मलाइका अरोरा

काठमाडौं– बलिउड अभिनेत्री तथा टेलिभिजन पर्सनालिटी मलाइका अरोरा काठमाडौं आइपुगेकी छन्। नेपाल रत्न तथा आभूषण संघले आयोजना गर्न लागेको फेसन रनवे शोमा भाग लिन मलाइका नेपाल आएकी हुन्।

बिहीबार बिहान त्रिभुवन अन्तर्राष्ट्रिय विमानस्थलमा अवतरण गरेकी मलाइकाले नेपाल आउन पाउँदा खुसी लागेको बताउँदै निम्तोका लागि धन्यवाद दिइन्। यसअघि पनि नेपाल आएकी उनले यस पटकको बसाइमा नेपालबारे थप बुझ्ने इच्छा रहेको सुनाइन्।

मलाइकाले नेपाली गहना र फेसन लगाउने अवसर पाउँदा निकै हर्षित भएको बताइन्। संघले नेपाली रत्न तथा आभूषणलाई विश्वमाझ चिनाउने उद्देश्यले तीन दिने एक्स्पो आयोजना गर्दै छ।

बिहीबार बेलुका हुने एक्स्पोको फेसन रनवेमा मलाइका सो स्टपर हुनेछन् भने नेपाली मोडलले र्‍याम्प नाप्नेछन्। तीन दिनसम्म चल्ने एक्स्पोमा सर्वसाधारणलाई निःशुल्क प्रवेश व्यवस्था छ।