संवैधानिक इजलासमा हुँदै गृहमन्त्री लामिछानेको नागरिकता विवादबारेको सुनुवाइ

काठमाडौं– सर्वोच्च अदालतको संवैधानिक इजलासमा राष्ट्रिय स्वतन्त्र पार्टीका अध्यक्ष एवं उपप्रधान तथा गृहमन्त्री रवि लामिछानेको नागरिकता विवादबारेको सुनुवाइ सुरु भएको छ।

शुक्रबार कामु प्रधानन्यायाधीश हरिकृष्ण कार्की, न्यायाधीशहरु ईश्वरप्रसाद खतिवडा, डा आनन्दमोहन भट्टराई, अनिलकुमार सिन्हा र प्रकाशमान सिंह राउतको इजलासमा पहिलो नम्बरमै उक्त मुद्दाको पेसी तोकिएको छ।

संवैधानिक इजलासले ६ पुसमा सुनुवाइ गर्दै अन्तरिम आदेश दिने वा नदिने विषयमा दुवै पक्षको छलफल आजका लागि राख्ने निर्णय गरेको थियो। आज अन्तरिम आदेश जारी गर्ने÷नगर्ने विषयमा बहस हुनेछ।   अधिवक्ता रविराज बसौला, युवराज पौडेललगायतले लामिछानेको सांसद पदको योग्यताबारे प्रश्न उठाउँदै रिट निवेदन दायर गरेका थिए।

नेपाली नागरिकता नलिई राजनीतिक दल खोलेको, प्रतिनिधिसभा निर्वाचनमा प्रतिस्पर्धा गरी सांसद बनेको उल्लेख गर्दै उपप्रधानमन्त्री लामिछानेको सांसद पद खारेजीको माग रिट निवेदनमा गरिएको छ। लामिछाने गत ४ मंसिरको निर्वाचनमा चितवन २ बाट प्रत्यक्ष निर्वाचित सांसद हुन्।